૬. પઠમભવસુત્તં

૭૭. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા આનન્દો ભગવન્તં એતદવોચ – ‘‘ભવો, ભવોતિ, ભન્તે, વુચ્ચતિ. કિત્તાવતા નુ ખો, ભન્તે, ભવો હોતી’’તિ?

‘‘કામધાતુવેપક્કઞ્ચ, આનન્દ, કમ્મં નાભવિસ્સ, અપિ નુ ખો કામભવો પઞ્ઞાયેથા’’તિ? ‘‘નો હેતં, ભન્તે’’. ‘‘ઇતિ ખો, આનન્દ, કમ્મં ખેત્તં, વિઞ્ઞાણં બીજં, તણ્હા સ્નેહો [સિનેહો (સી. સ્યા. કં. પી.)]. અવિજ્જાનીવરણાનં સત્તાનં તણ્હાસંયોજનાનં હીનાય ધાતુયા વિઞ્ઞાણં પતિટ્ઠિતં એવં આયતિં [આયતિ (સી.)] પુનબ્ભવાભિનિબ્બત્તિ હોતિ. ( ) [(એવં ખો આનન્દ ભવો હોતીતિ) (ક.) દુતિયસુત્તે પન ઇદં પાઠનાનત્તં નત્થિ]

‘‘રૂપધાતુવેપક્કઞ્ચ, આનન્દ, કમ્મં નાભવિસ્સ, અપિ નુ ખો રૂપભવો પઞ્ઞાયેથા’’તિ? ‘‘નો હેતં, ભન્તે’’. ‘‘ઇતિ ખો આનન્દ, કમ્મં ખેત્તં, વિઞ્ઞાણં બીજં, તણ્હા સ્નેહો. અવિજ્જાનીવરણાનં સત્તાનં તણ્હાસંયોજનાનં મજ્ઝિમાય ધાતુયા વિઞ્ઞાણં પતિટ્ઠિતં એવં આયતિં પુનબ્ભવાભિનિબ્બત્તિ હોતિ. ( ) [(એવં ખો આનન્દ ભવો હોતીતિ) (ક.) દુતિયસુત્તે પન ઇદં પાઠનાનત્તં નત્થિ]

‘‘અરૂપધાતુવેપક્કઞ્ચ, આનન્દ, કમ્મં નાભવિસ્સ, અપિ નુ ખો અરૂપભવો પઞ્ઞાયેથા’’તિ? ‘‘નો હેતં, ભન્તે’’. ‘‘ઇતિ ખો, આનન્દ, કમ્મં ખેત્તં, વિઞ્ઞાણં બીજં, તણ્હા સ્નેહો. અવિજ્જાનીવરણાનં સત્તાનં તણ્હાસંયોજનાનં પણીતાય ધાતુયા વિઞ્ઞાણં પતિટ્ઠિતં એવં આયતિં પુનબ્ભવાભિનિબ્બત્તિ હોતિ. એવં ખો, આનન્દ, ભવો હોતી’’તિ. છટ્ઠં.