૮. થેરસુત્તં

૯૮. ‘‘દસહિ, ભિક્ખવે, ધમ્મેહિ સમન્નાગતો થેરો ભિક્ખુ યસ્સં યસ્સં દિસાયં વિહરતિ, ફાસુયેવ વિહરતિ. કતમેહિ દસહિ? થેરો હોતિ રત્તઞ્ઞૂ ચિરપબ્બજિતો, સીલવા હોતિ …પે… સમાદાય સિક્ખતિ સિક્ખાપદેસુ, બહુસ્સુતો હોતિ…પે… દિટ્ઠિયા સુપ્પટિવિદ્ધો, ઉભયાનિ ખો પનસ્સ પાતિમોક્ખાનિ વિત્થારેન સ્વાગતાનિ હોન્તિ સુવિભત્તાનિ સુપ્પવત્તીનિ સુવિનિચ્છિતાનિ સુત્તસો અનુબ્યઞ્જનસો, અધિકરણસમુપ્પાદવૂપસમકુસલો હોતિ, ધમ્મકામો હોતિ પિયસમુદાહારો અભિધમ્મે અભિવિનયે ઉળારપામોજ્જો, સન્તુટ્ઠો હોતિ ઇતરીતરચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારેન, પાસાદિકો હોતિ અભિક્કન્તપટિક્કન્તે [અભિક્કન્તપટિક્કન્તો (ક.)] સુસંવુતો અન્તરઘરે નિસજ્જાય, ચતુન્નં ઝાનાનં આભિચેતસિકાનં દિટ્ઠધમ્મસુખવિહારાનં નિકામલાભી હોતિ અકિચ્છલાભી અકસિરલાભી, આસવાનઞ્ચ ખયા અનાસવં ચેતોવિમુત્તિં પઞ્ઞાવિમુત્તિં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરતિ. ઇમેહિ ખો, ભિક્ખવે, દસહિ ધમ્મેહિ સમન્નાગતો થેરો ભિક્ખુ યસ્સં યસ્સં દિસાયં વિહરતિ, ફાસુયેવ વિહરતી’’તિ. અટ્ઠમં.