४. छब्बस्ससिक्खापदवण्णना

५५७. छब्बस्ससिक्खापदे पन ‘‘येसं नो सन्थते दारका उहदन्तिपि उम्मिहन्तिपि, येसं नो सन्थता उन्दूरेहिपि खज्जन्ती’’ति एवं पाळिपदानं सम्बन्धो वेदितब्बो. हद करीसोस्सग्गे, मिह सेचनेति पनिमस्सत्थं सन्धायाह ‘‘वच्चम्पि पस्सावम्पि करोन्ती’’ति. पवारणाउपोसथपाटिपददिवसेसु सन्थतं करित्वा पुन छट्ठे वस्से परिपुण्णे पवारणाउपोसथपाटिपददिवसेसु करोन्तो ‘‘छब्बस्सानि करोती’’ति वुच्चति. दुतियदिवसतो पट्ठाय करोन्तो पन अतिरेकछब्बस्सानि करोति नाम.

छब्बस्ससिक्खापदवण्णना निट्ठिता.