अमनुस्सिकाबाधकथा

अमनुस्सिकाबाधकथायं ‘‘अनुजानामि, भिक्खवे, अमनुस्सिकाबाधे आमकमंसं आमकमंसलोहित’’न्ति (महाव. २६४) वचनतो यस्स भिक्खुनो आमकमंसं खादितस्स आमकलोहितं पिवितस्स सो अमनुस्साबाधो पटिप्पस्सम्भति, तस्स अनापत्ति. तत्थ आमकमंसञ्च खादि, आमकलोहितञ्च पिवीति न तं भिक्खु खादि, न पिवि, अमनुस्सो खादित्वा च पिवित्वा च पक्कन्तो. तेन वुत्तं ‘‘तस्स सो अमनुस्सिकाबाधो पटिप्पस्सम्भी’’ति.