चुण्णकथा

चुण्णकथायं ‘‘अनुजानामि, भिक्खवे, यस्स कण्डु वा पीळका वा अस्सावो वा थुल्लकच्छु वा आबाधो कायो वा दुग्गन्धो चुण्णानि भेसज्जानि, अगिलानस्स छकणं मत्तिकं रजननिप्पक्कं. अनुजानामि, भिक्खवे, उदुक्खलं मुसल’’न्ति (महाव. २६४). ‘‘कायो वा दुग्गन्धोति कस्सचि अस्सादीनं विय कायगन्धो होति, तस्सपि सिरीसकोसुम्बादिचुण्णानि वा गन्धचुण्णानि वा सब्बानि वट्टन्ति. छकणन्ति गोमयं. रजननिप्पक्कन्ति रजनकसटं, पाकतिकचुण्णम्पि कोट्टेत्वा उदकेन तेमेत्वा न्हायितुं वट्टति, एतम्पि रजननिप्पक्कसङ्खमेव गच्छती’’ति अट्ठकथायं (महाव. अट्ठ. २६४) वुत्तं. सारत्थदीपनियं (सारत्थ. टी. महावग्ग ३.२६४) पन ‘‘छकणन्ति गोमयं. पाकतिकचुण्णं नाम अपक्ककसावचुण्णं. तेन ठपेत्वा गन्धचुण्णं सब्बं वट्टतीति वदन्ती’’ति वुत्तं. विमतिविनोदनियम्पि (वि. वि. टी. महावग्ग २.२६४-२६५) ‘‘छकणन्ति गोमयं. पाकतिकचुण्णन्ति अपक्ककसावचुण्णं, गन्धचुण्णं पन न वट्टती’’ति वुत्तं. वजिरबुद्धिटीकायम्पि (वजिर. टी. महावग्ग २६४) ‘‘छकणन्ति गोमयं. पाकतिकचुण्णं नाम अपक्ककसावचुण्णं. तेन ठपेत्वा गन्धचुण्णं सब्बं वट्टतीति वदन्ती’’ति वुत्तं. ‘‘अनुजानामि, भिक्खवे, चुण्णचालिनि’’न्ति (महाव. २६४) वचनतो गिलानानं भिक्खूनं चुण्णेहि भेसज्जेहि चालितेहि अत्थे सति चुण्णचालिनी वट्टति. ‘‘अनुजानामि, भिक्खवे, दुस्सचालिनि’’न्ति (महाव. २६४) वचनतो सण्हेहि चुण्णेहि अत्थे सति दुस्सचालिनी वट्टति. ‘‘चुण्णचालिनिन्ति उदुक्खले कोट्टितचुण्णपरिस्सावनि’’न्ति विमतिविनोदनियं (वि. वि. टी. महावग्ग २.२६४-२६५) वुत्तं. वजिरबुद्धिटीकायम्पि (वजिर. टी. महावग्ग २६४) ‘‘चालितेहीति परिस्सावितेही’’ति वुत्तं.