कसावभेसज्जकथा

कसावभेसज्जकथायं ‘‘अनुजानामि, भिक्खवे, कसावानि भेसज्जानि निम्बकसावं कुटजकसावं पटोलकसावं फग्गवकसावं नत्तमालकसावं, यानि वा पनञ्ञानिपि अत्थि कसावानि भेसज्जानि नेव खादनीये खादनीयत्थं फरन्ति, न भोजनीये भोजनीयत्थं फरन्ति, तानि पटिग्गहेत्वा यावजीवं परिहरितुं, सति पच्चये परिभुञ्जितुं, असति पच्चये परिभुञ्जन्तस्स आपत्ति दुक्कटस्सा’’ति (महाव. २६३) वचनतो तानिपि कसावभेसज्जानि पटिग्गहेत्वा यावजीवं परिहरितुं सति पच्चये परिभुञ्जितुं वट्टति. तत्थ फग्गवन्ति लताजाति. नत्तमालन्ति करञ्जं. ‘‘कसावेहीति तचादीनि उदके तापेत्वा गहितऊसरेही’’ति विमतिविनोदनियं (वि. वि. टी. महावग्ग २.२६३) वुत्तं.