मूलभेसज्जकथा

मूलभेसज्जकथायं ‘‘अनुजानामि, भिक्खवे, मूलानि भेसज्जानि, हलिद्दिं सिङ्गिवेरं वचं वचत्तं अतिविसं कटुकरोहिणिं उसीरं भद्दमुत्तकं, यानि वा पनञ्ञानिपि अत्थि मूलानि भेसज्जानि नेव खादनीये खादनीयत्थं फरन्ति, न भोजनीये भोजनीयत्थं फरन्ति, तानि पटिग्गहेत्वा यावजीवं परिहरितुं, सति पच्चये परिभुञ्जितुं. असति पच्चये परिभुञ्जन्तस्स आपत्ति दुक्कटस्सा’’ति. तत्थ वचत्तन्ति सेतवचं. सेसं हेट्ठा वुत्तमेव.