वसाभेसज्जकथा

वसाभेसज्जकथायं ‘‘अनुजानामि, भिक्खवे, वसानि भेसज्जानि अच्छवसं मच्छवसं सुसुकावसं सूकरवसं गद्रभवसं काले पटिग्गहितं काले निप्पक्कं काले संसट्ठं तेलपरिभोगेन परिभुञ्जितुं. विकाले चे, भिक्खवे, पटिग्गहितं विकाले निप्पक्कं विकाले संसट्ठं, तञ्चे परिभुञ्जेय्य, आपत्ति तिण्णं दुक्कटानं. काले चे, भिक्खवे, पटिग्गहितं विकाले निप्पक्कं विकाले संसट्ठं, तञ्चे परिभुञ्जेय्य, आपत्ति द्विन्नं दुक्कटानं. काले चे, भिक्खवे, पटिग्गहितं काले निप्पक्कं विकाले संसट्ठं, तञ्चे परिभुञ्जेय्य, आपत्ति दुक्कटस्स. काले चे, भिक्खवे, पटिग्गहितं काले निप्पक्कं काले संसट्ठं, तञ्चे परिभुञ्जेय्य, अनापत्ती’’ति (महाव. २६२). तत्थ ‘‘काले पटिग्गहितन्तिआदीसु मज्झन्हिके अवीतिवत्ते पटिग्गहेत्वा पचित्वा परिस्सावेत्वा चाति अत्थो. तेलपरिभोगेन परिभुञ्जितुन्ति सत्ताहकालिकतेलपरिभोगेन परिभुञ्जितु’’न्ति अट्ठकथायं (महाव. अट्ठ. २६२) वुत्तं, टीकासु (सारत्थ. टी. महावग्ग ३.२६२; वि. वि. टी. महावग्ग २.२६१-२६२) पन ‘‘सुसुकाति समुद्दे भवा एका मच्छजाति, कुम्भिलातिपि वदन्ति. संसट्ठन्ति परिस्सावितं. तेलपरिभोगेनाति सत्ताहकालिकपरिभोगं सन्धाय वुत्त’’न्ति वुत्तं. अयमेत्थ सङ्खेपो, वित्थारो पन हेट्ठा चतुकालिककथायं वुत्तोयेव.