अट्ठवरकथा

अट्ठवरकथायं ‘‘अनुजानामि, भिक्खवे, वस्सिकसाटिकं आगन्तुकभत्तं गमिकभत्तं गिलानभत्तं गिलानुपट्ठाकभत्तं गिलानभेसज्जं धुवयागुं भिक्खुनिसङ्घस्स उदकसाटिक’’न्ति वचनतो इमानि अट्ठ दानानि सम्पटिच्छितुं वट्टति. तत्थ निक्खित्तचीवरा हुत्वा कायं ओवस्सन्तानं भिक्खूनं नग्गियं असुचि जेगुच्छं पटिकूलं होति, तस्मा वस्सिकसाटिका अनुञ्ञाता. आगन्तुको भिक्खु न वीथिकुसलो होति, न गोचरकुसलो, किलन्तो पिण्डाय चरति, तस्मा आगन्तुकभत्तं अनुञ्ञातं, गमिको भिक्खु अत्तनो भत्तं परियेसमानो सत्था वा विहायिस्सति, यत्थ वा वासं गन्तुकामो भविस्सति, तत्थ विकालेन उपगच्छिस्सति, किलन्तो अद्धानं गमिस्सति, तस्मा गमिकभत्तं. गिलानस्स भिक्खुनो सप्पायानि भोजनानि अलभन्तस्स आबाधो वा अभिवड्ढिस्सति, कालकिरिया वा भविस्सति, तस्मा गिलानभत्तं. गिलानुपट्ठाको भिक्खु अत्तनो भत्तं परियेसमानो गिलानस्स उस्सूरे भत्तं नीहरिस्सति, तस्मा गिलानुपट्ठाकभत्तं. गिलानस्स भिक्खुनो सप्पायानि भेसज्जानि अलभन्तस्स आबाधो वा अभिवड्ढिस्सति, कालकिरिया वा भविस्सति, तस्मा गिलानभेसज्जं. यस्मा भगवता अन्धकविन्दे दसानिसंसे सम्पस्समानेन यागु अनुञ्ञाता, तस्मा धुवयागु. यस्मा मातुगामस्स नग्गियं असुचि जेगुच्छं पटिकूलं होति, तस्मा भिक्खुनिसङ्घस्स उदकसाटिका अनुञ्ञाता.