गुळकथा

गुळकथायं ‘‘अनुजानामि, भिक्खवे, गिलानस्स गुळं, अगिलानस्स गुळोदक’’न्ति (महाव. २८४) वचनतो गिलानो भिक्खु गुळपिण्डं विकालेपि खादितुं वट्टति. अगिलानो पन उदकसम्भिन्नं कत्वा गुळोदकपरिभोगेन परिभुञ्जितुं वट्टति. ‘‘गिलानस्स गुळन्ति तथारूपेन ब्याधिना गिलानस्स पच्छाभत्तं गुळं अनुजानामीति अत्थो’’ति अट्ठकथायं (महाव. अट्ठ. २८४) वुत्तं. ‘‘तथारूपेन ब्याधिना’’ति वुत्तत्ता यथारूपेन ब्याधिना गिलानस्स गुळो परिभुञ्जितब्बो होति, तथारूपेन एव ब्याधिना गिलानस्साति वुत्तं विय दिस्सति, वीमंसित्वा गहेतब्बं.

एत्तकासु कथासु या या संवण्णेतब्बप्पकरणे न दिस्सति, सा सा अम्हेहि पेसलानं भिक्खूनं कोसल्लत्थं पाळितो च अट्ठकथातो च गहेत्वा टीकाचरियानं वचनेहि अलङ्करित्वा ठपिता, तस्मा निक्कङ्खा हुत्वा पण्डिता उपधारेन्तु.