अभिसन्नकायकथा

अभिसन्नकायकथायं ‘‘अनुजानामि, भिक्खवे, विरेचनं पातु’’न्ति (महाव. २६९) वचनतो अभिसन्नकायस्स भिक्खुनो विरेचनं पातुं वट्टति. तत्थ अभिसन्नकायोति उस्सन्नदोसकायो. अच्छकञ्जिया अत्थो होति, ‘‘अनुजानामि, भिक्खवे, अच्छकञ्जिय’’न्ति (महाव. २६९) वचनतो अच्छकञ्जियं पातुं वट्टति. तत्थ अच्छकञ्जियन्ति तण्डुलोदकमण्डो. अकटयूसेन अत्थो होति, ‘‘अनुजानामि, भिक्खवे, अकटयूस’’न्ति (महाव. २६९) वचनतो अकटयूसं पातुं वट्टति. तत्थ अकटयूसन्ति असिनिद्धो मुग्गपचितपानीयो. सारत्थदीपनियं (सारत्थ. टी. महावग्ग ३.२६९) पन विमतिविनोदनियञ्च (वि. वि. टी. महावग्ग २.२६७-२६९) ‘‘अकटयूसेनाति अनभिसङ्खतेन मुग्गयूसेना’’ति वुत्तं. कटाकटेन अत्थो होति, ‘‘अनुजानामि, भिक्खवे, कटाकट’’न्ति (महाव. २६९) वचनतो कटाकटं पायेतुं वट्टति. तत्थ कटाकटन्ति सोव धोतसिनिद्धो. सारत्थदीपनियं (सारत्थ. टी. महावग्ग ३.२६९) विमतिविनोदनियञ्च (वि. वि. टी. महावग्ग २.२६७-२६९) ‘‘कटाकटेनाति मुग्गे पचित्वा अचालेत्वाव परिस्सावितेन मुग्गयूसेना’’ति वुत्तं. पटिच्छादनीयेन अत्थो होति, ‘‘अनुजानामि, भिक्खवे, पटिच्छादनीय’’न्ति (महाव. २६९) वचनतो पटिच्छादनीयं पातुं वट्टति. तत्थ पटिच्छादनीयेनाति मंसरसेन.