१०. छन्दंअदत्वागमनसिक्खापदवण्णना

४८१. सन्निपातं अनागन्त्वा चे छन्दं न देति, अनापत्तीति एके. दुक्कटन्ति एके धम्मकम्मन्तरायकरणाधिप्पायत्ता. सङ्घमज्झे छन्दं दातुं लभतीति केचि. दिन्नछन्दे सङ्घमज्झं पविसित्वा पुन गतेपि छन्दो न पटिप्पस्सम्भेय्याति चे? पटिप्पस्सम्भति. कस्मा? ‘‘अहत्थपासो छन्दारहो’’तिआदीहि विरुज्झनतो. पाळियं पन दातुकामताय हत्थपासं अतिक्कमन्तं सन्धाय वुत्तन्ति केचि.

छन्दंअदत्वागमनसिक्खापदवण्णना निट्ठिता.