११. दुब्बलसिक्खापदवण्णना

४८४-५. अदासीति अपलोकेत्वा अदासि. भिक्खूति एत्थ ते छब्बग्गिया अत्तानं परिवज्जयित्वा ‘‘सङ्घो’’ति अवत्वा ‘‘भिक्खू’’ति आहंसु. परिणामेन्तीति नेन्ति. तत्थ लाभोति पदुद्धारकरणं इध अनधिप्पेतस्सपि यस्स कस्सचि अत्थुद्धारवसेन लाभदीपनत्थं. चीवरमेव हि इधाधिप्पेतं, तेनेव ‘‘अञ्ञं परिक्खारं दिन्नं खीयति, आपत्ति दुक्कटस्सा’’ति वुत्तं. दिन्नन्ति च परिक्खारन्ति च भुम्मत्थे उपयोगवचनं.

दुब्बलसिक्खापदवण्णना निट्ठिता.