८. भूतारोचनसिक्खापदवण्णना

६७. ‘‘चतुत्थपाराजिकवत्थु च इदञ्च एकमेवा’’ति वुत्तं, न युत्तं. कस्मा? तत्थ ‘‘मोघपुरिसा’’ति वुत्तत्ता. ते अरियमिस्सका न होन्तीति द्वेपि एकसदिसानीति मम तक्को. ‘‘अरियापि पटिजानिंसु, तेसम्पि अब्भन्तरे विज्जमानत्ता उत्तरिमनुस्सधम्मस्सा’’ति लिखितं. ‘‘सब्बेपि भूतं भगवाति पुथुज्जनअरियानं उत्तरिमनुस्सधम्मस्स आरोचितत्ता ‘भूत’न्ति वुत्तं, न अत्तनो उत्तरिमनुस्सधम्मं सन्धायाति अपरे’’ति वुत्तं.

७७. पुब्बे अवुत्तेहीति चतुत्थपाराजिके अवुत्तेहीति.

भूतारोचनसिक्खापदवण्णना निट्ठिता.