६. सुरुसुरुवग्गवण्णना

६२७. ‘‘सुरुसुरु’’न्ति च ‘‘सुरोसुरो’’ति च पाठो. सीतीकतोति सीतङ्को. ‘‘सिलकबुद्धोति अरियानं परिहासवचनमेवेत’’न्ति लिखितं.

६३१. पटिक्कूलवसेनाति एत्थ यदि पटिक्कूलवसेन पटिक्खित्तं, ‘‘सेय्यथापि कामभोगिनो’’ति न वत्तब्बं. न हि ते पटिक्कूलं करोन्तीति चे? न, इस्सरियलिङ्गवसेन गहणसम्भवतो. ते हि अनादरा होन्ति. पत्तधोवनन्ति पत्तधोवनोदकं भोजनपटिसंयुत्तं.

६३४. ‘‘छत्तपादुकाय’’न्ति च ‘‘छत्तपादे’’ति च पाठो.

६३७. चापोति सत्तखादनवधो. ‘‘सेसा सब्बा धनुविकति कोदण्डे पविट्ठा’’ति च लिखितं, पटिमुक्कन्ति पवेसितं, लग्गितं होतीति अत्थो.

सुरुसुरुवग्गवण्णना निट्ठिता.