१. कोसियसिक्खापदवण्णना

५४२. कोसियकारकोति एत्थ कोसं करोन्तीति ‘‘कोसकारा’’ति लद्धवोहारानं पाणकानं कोसतो निब्बत्तं कोसियं नाम. अत्तना कतं चे? निस्सज्जनकाले ‘‘सयं कतं निस्सग्गिय’’न्ति वत्तब्बं. उभोहि चे कतं, यथापाठमेव वत्तब्बं. अत्तना च परेहि च विप्पकतं अत्तना परियोसापेतीतिआदिचतुक्कम्पि सम्भवन्तं न दस्सितं. विनयधम्मता हेसा, यदिदं एकस्मिं तिके वा चतुक्के वा दस्सिते इतरं सम्भवन्तम्पि न वुच्चतीति.

कोसियसिक्खापदवण्णना निट्ठिता.