७-८. हालिद्दिकानिसुत्तादिवण्णना

१३०-१३१. तं इत्थेतन्ति चक्खुना यं रूपं दिट्ठं, तं इत्थन्ति अत्थो. तं सुखवेदनियन्ति तं सुखवेदनाय उपनिस्सयकोटिया पच्चयभूतं चक्खुविञ्ञाणञ्चेव, यो च यथारहं उपनिस्सयकोटिया वा, अनन्तरो चे अनन्तरकोटिया वा, सहजातो चे सम्पयुत्तकोटिया वा, सुखवेदनाय पच्चयो फस्सो. तं सुखवेदनियञ्च फस्सं पटिच्च उप्पज्जति सुखवेदनाति योजना. एस नयो सब्बत्थ सब्बेसु सेसेसु सत्तसु वारेसु. मनोधातुयेव वा समानाति अभिधम्मनयेन. सुत्तन्तनयेन पन सुञ्ञतट्ठेन निस्सत्तनिज्जीवट्ठेन च मनोधातुसमञ्ञं लभतेव. अट्ठमं उत्तानमेव हेट्ठा वुत्तनयत्ता.

हालिद्दिकानिसुत्तादिवण्णना निट्ठिता.