७. गद्दुलबद्धसुत्तवण्णना

९९. यं महासमुद्दोति एत्थ यन्ति समयस्स पच्चामसनं. भुम्मत्थे चेतं पच्चत्तवचनन्ति आह ‘‘यस्मिं समये’’ति. सो च समयो अयन्ति दस्सेन्तो ‘‘पञ्चमे सूरिये उट्ठिते’’ति आह. परिच्छेदं न वदामि परिच्छेदकारिकाय अग्गमग्गविज्जाय अनधिगतत्ता. सुनखो विय वट्टनिस्सितो बालो असवसभावतो. गद्दुलो विय दिट्ठिबन्धो. सक्कायो तस्स असवसभावतो. पुथुज्जनस्स सक्कायानुपरिवत्तनन्ति ‘‘सन्ताने सत्तवोहारो’’ति तं ततो अञ्ञं कत्वा भेदेन निद्देसो.

गद्दुलबद्धसुत्तवण्णना निट्ठिता.