(२) पाराजिकादिपञ्हावण्णना

४८०. सन्थतपेय्यालञ्चाति पठमपाराजिकविभङ्गे (पारा. ६५) वुत्तं सन्थतपेय्यालञ्च.

लिङ्गपरिवत्तं सन्धायाति सति लिङ्गे परिवत्ते पटिग्गहणस्स विजहनं सन्धाय वुत्तं.

योति भिक्खु, परिणामेतीति सम्बन्धो. अत्तनो अत्थायाति योजना.

अस्साति गाथाय. काकउहदन्ति काकेहि करीसुस्सग्गं. कद्दममक्खितन्ति कद्दमेन मक्खितं. कायगतानेव हुत्वाति सम्बन्धो.

हीति वित्थारो. अनरियं तं इत्थिं वा तं पुरिसं वा हनेय्याति योजना. लिङ्गपरिवत्तेन हेतुभूतेन इत्थिभूतं, पुरिसभूतञ्चाति सम्बन्धो. इत्थिभूतन्ति च इत्थी हुत्वा भूतं, इत्थिभावं वा पत्तं.

मिगसिङ्गतापससीहकुमारादीनं तिरच्छानगतमातापितरो वियाति योजना. मिगसिङ्गतापसोति मिगसिङ्गनामको (जा. अट्ठ. ५.१७.९६ आदयो) तापसो. सीहकुमारोति सीहबाहुकुमारो. आदिसद्देन भूरिदत्तादयो सङ्गण्हाति.

कुरुन्दियं आगतन्ति सम्बन्धो.

‘‘सच्चं भणन्तोति गाथाया’’ति पदं ‘‘सच्चं भासतो लहुकापत्ति होती’’ति एत्थ इतिसद्देन सम्बन्धितब्बं. ‘‘सच्चं भणन्तो’’ति गाथाय इति अत्थोति योजना.