३. युत्तिहारसम्पातवण्णना

६५. पटिपक्खपटिबाळ्हा कुसला धम्मा उप्पज्जितुमेव न सक्कोन्ति, उप्पन्नापि सम्मदेव अत्तनो किच्चं कातुं असमत्थताय अनुप्पन्नसदिसाति पटिपक्खनिवारणेन कुसलानं धम्मानं किच्चकरणभावं दस्सेतुं ‘‘मनच्छट्ठानि…पे… भविस्सती’’ति वुत्तं. विहरन्तस्साति विहरणहेतु. विहरन्तोति एत्थापि एसेव नयो, तेन रक्खितचित्तता वुत्तनयेन एकन्ततो सम्मासङ्कप्पगोचरताय च संवत्ततीति दस्सेति. वुत्तनयेनाति मिच्छासङ्कप्पानं अवसरं अदत्वा विसोधितनेक्खम्मादिवितक्कताय. अविपरीतमेवाति कायादिअसुभादितो आदानं. विनिपातभयन्ति दुग्गतिभयं. सब्बोपि चायमत्थोति ‘‘सम्मासङ्कप्पगोचरो सम्मादिट्ठि भविस्सती’’तिआदीसु अत्थो युत्तिया युत्तो एव अनरूपकारणभावतो.

युत्तिहारसम्पातवण्णना निट्ठिता.