४. रजननिद्देसवण्णना

५८. मूलञ्च खन्धो च तचो च पत्तञ्च फलञ्च पुप्फञ्च, तेसं पभेदोति छट्ठीतप्पुरिसो. अथ वा पभेद-सद्दस्स कम्मसाधनत्ते तानियेव पभेदोति कम्मधारयो, ततो. रजन्ति एतेहीति रजनानि, मूलादीनि. ‘‘अनुजानामि, भिक्खवे, छ रजनानि मूलरजन’’न्तिआदिना (महाव. ३४४) भगवता अनुञ्ञातत्ता वुत्तं ‘‘रजना छप्पकारानि, अनुञ्ञातानि सत्थुना’’ति.

५९. मूलेति मूलरजने हलिद्दिं विवज्जिय सब्बं लब्भन्ति सम्बन्धो. एवं सब्बत्थ. मञ्जेट्ठि च तुङ्गहारको चाति द्वन्दो. अल्लि-सद्देन नीलि-सद्देन च तेसं गच्छजातीनं पत्तानि गहितानि उपचारेन, तथा लोद्द-सद्देन कण्डुल-सद्देन च तचो, कुसुम्भ-सद्देन किं सुक-सद्देन च पुप्फानि. तेनेव च तानि नपुंसकानि. तुङ्गहारको नाम एको कण्टकरुक्खो, तस्स हरितालवण्णं खन्धरजनं होति. अल्लिपत्तेन एकवारं गिहिपरिभुत्तं रजितुं वट्टति. फलरजने सब्बम्पि वट्टति.

रजननिद्देसवण्णना निट्ठिता.