४. काणमातासिक्खापदवण्णना

पहेणकत्थायाति पण्णाकारत्थाय. पाथेय्यत्थायाति मग्गं गच्छन्तानं अन्तरामग्गत्थाय. सत्तूति बद्धसत्तु, अबद्धसत्तु च. द्वत्तिपत्तपूरे पटिग्गहेत्वाति मुखवट्टिया हेट्ठिमलेखाय समं पूरे द्वत्तिपत्तपूरे गहेत्वाति अत्थो. इमस्स चत्थस्स हेट्ठा वुत्तनयेनेव पाकटत्ता तत्थ कत्तब्बप्पकारमेव दस्सेतुं ‘‘एत्था’’तिआदिमाह. सेसन्ति ततो एकपत्ततो अञ्ञं पत्तं. सचे तयो पत्तपूरा गहिता द्वे, सचे द्वे गहिता, एकन्ति वुत्तं होति.

गमने वा पटिप्पस्सद्धेति अन्तरामग्गे उपद्दवं दिस्वा, अनत्थिकताय वा ‘‘मयं इदानि न पेसिस्साम न गमिस्सामा’’ति एवं गमने उपच्छिन्ने देन्तानन्ति अत्थो.

काणमातासिक्खापदवण्णना निट्ठिता.