१०. रहोनिसज्जसिक्खापदवण्णना

उपरीति अचेलकवग्गे. उपनन्दस्स चतुत्थसिक्खापदेनाति अप्पटिच्छन्ने मातुगामेन सद्धिं रहोनिसज्जसिक्खापदेन (पाचि. २८४ आदयो). तञ्हि उपनन्दत्थेरं आरब्भ पञ्ञत्तेसु चतुत्थभावतो ‘‘उपनन्दस्स चतुत्थसिक्खापद’’न्ति वुत्तं. यदि एकपरिच्छेदं, अथ कस्मा विसुं पञ्ञत्तन्ति आह ‘‘अट्ठुप्पत्तिवसेन पन विसुं पञ्ञत्त’’न्ति. तत्थ अट्ठुप्पत्तिवसेनाति अत्थस्स उप्पत्तिवसेन, भिक्खुनिया एव रहोनिसज्जाय उप्पत्तिवसेनाति अत्थो. अयं हेत्थाधिप्पायो – चतुत्थसिक्खापदवत्थुतो इमस्स सिक्खापदस्स वत्थुनो पठमं उप्पन्नत्ता एकपरिच्छेदेपि इदं पठमं विसुं पञ्ञत्तन्ति.

रहोनिसज्जसिक्खापदवण्णना निट्ठिता.

ओवादवग्गो ततियो.