६. अभिक्खुकावाससिक्खापदवण्णना

छट्ठे सचे भिक्खुनुपस्सयतो अद्धयोजनब्भन्तरे ओवाददायका भिक्खू न वसन्ति, मग्गो वा अखेमो होति न सक्का अनन्तरायेन गन्तुं, अयं अभिक्खुको नाम आवासो. तत्थ ‘‘वस्सं वसिस्सामी’’ति सेनासनपञ्ञापनपानीयउपट्ठापनादीनि करोन्तिया दुक्कटं, सह अरुणुग्गमना पाचित्तियं. अयमेत्थ सङ्खेपो, वित्थारो पन समन्तपासादिकायं (पाचि. अट्ठ. १४४ आदयो) वुत्तो.

सावत्थियं सम्बहुला भिक्खुनियो आरब्भ अभिक्खुके आवासे वस्सं वसनवत्थुस्मिं पञ्ञत्तं, यत्थ पन वस्सूपगता भिक्खू पक्कन्ता वा होन्ति विब्भन्ता वा कालङ्कता वा पक्खसङ्कन्ता वा तत्थ वसन्तिया, आपदासु, उम्मत्तिकादीनञ्च अनापत्ति. अभिक्खुकावासता, वस्सूपगमनं, अरुणुग्गमनन्ति इमानेत्थ तीणि अङ्गानि. समुट्ठानादीनि एळकलोमसदिसानेवाति.

अभिक्खुकावाससिक्खापदवण्णना निट्ठिता.