विवादमूलछक्कवण्णना

३२५. कोधनोति कुज्झनसीलो. यस्मा सो अप्पहीनकोधताय विगतकोधनो नाम न होति, तस्मा ‘‘कोधेन समन्नागतो’’ति आह. उपनाहो एतस्स अत्थि, उपनय्हनसीलोति वा उपनाही. विवादो नाम उप्पज्जमानो येभुय्येन पठमं द्विन्नं वसेन उप्पज्जतीति वुत्तं ‘‘द्विन्नं भिक्खूनं विवादो’’ति. सो पन यथा बहूनं अनत्थावहो होति, तं निदस्सनमुखेन दस्सेन्तो ‘‘कथ’’न्तिआदिमाह. अब्भन्तरपरिसायाति परिसब्भन्तरे.

परगुणमक्खनाय पवत्तोपि अत्तनो कारकं गूथेन पहरन्तं गूथो विय पठमतरं मक्खेतीति मक्खो, सो एतस्स अत्थीति मक्खी. पलासतीति पलासो, परस्स गुणे डंसित्वा विय अपनेतीति अत्थो, सो एतस्स अत्थीति पलासी. पलासी पुग्गलो हि दुतियस्स धुरं न देति, समं पसारेत्वा तिट्ठति. तेनाह ‘‘युगग्गाहलक्खणेन पलासेन समन्नागतो’’ति. ‘‘इस्सुकी’’तिआदीनं पदानमत्थो हेट्ठा वुत्तनयत्ता सुविञ्ञेय्योव. कम्मपथप्पत्ताय मिच्छादिट्ठिया वसेनेत्थ मिच्छादिट्ठि वेदितब्बाति आह ‘‘नत्थिकवादी अहेतुकवादी अकिरियवादी’’ति.