७. कण्डकविमानवत्थु

११७१. ‘‘पुण्णमासे यथा चन्दो, नक्खत्तपरिवारितो;

समन्ता अनुपरियाति, तारकाधिपती ससी.

११७२. ‘‘तथूपमं इदं ब्यम्हं, दिब्बं देवपुरम्हि च;

अतिरोचति वण्णेन, उदयन्तोव रंसिमा.

११७३. ‘‘वेळुरियसुवण्णस्स, फलिका रूपियस्स च;

मसारगल्लमुत्ताहि, लोहितङ्गमणीहि च.

११७४. ‘‘चित्रा मनोरमा भूमि, वेळूरियस्स सन्थता;

कूटागारा सुभा रम्मा, पासादो ते सुमापितो.

११७५. ‘‘रम्मा च ते पोक्खरणी, पुथुलोमनिसेविता;

अच्छोदका विप्पसन्ना, सोवण्णवालुकसन्थता.

११७६. ‘‘नानापदुमसञ्छन्ना, पुण्डरीकसमोतता [समोत्थता (क.), समोगता (स्या.)];

सुरभिं सम्पवायन्ति, मनुञ्ञा मालुतेरिता.

११७७. ‘‘तस्सा ते उभतो पस्से, वनगुम्बा सुमापिता;

उपेता पुप्फरुक्खेहि, फलरुक्खेहि चूभयं.

११७८. ‘‘सोवण्णपादे पल्लङ्के, मुदुके गोणकत्थते [चोलसन्थते (सी.)];

निसिन्नं देवराजंव, उपतिट्ठन्ति अच्छरा.

११७९. ‘‘सब्बाभरणसञ्छन्ना, नानामालाविभूसिता;

रमेन्ति तं महिद्धिकं, वसवत्तीव मोदसि.

११८०. ‘‘भेरिसङ्खमुदिङ्गाहि, वीणाहि पणवेहि च;

रमसि रतिसम्पन्नो, नच्चगीते सुवादिते.

११८१. ‘‘दिब्बा ते विविधा रूपा, दिब्बा सद्दा अथो रसा;

गन्धा च ते अधिप्पेता, फोट्ठब्बा च मनोरमा.

११८२. ‘‘तस्मिं विमाने पवरे, देवपुत्त महप्पभो;

अतिरोचसि वण्णेन, उदयन्तोव भाणुमा.

११८३. ‘‘दानस्स ते इदं फलं, अथो सीलस्स वा पन;

अथो अञ्जलिकम्मस्स, तं मे अक्खाहि पुच्छितो’’.

११८४. सो देवपुत्तो अत्तमनो…पे… यस्स कम्मस्सिदं फलं.

११८५. ‘‘अहं कपिलवत्थुस्मिं, साकियानं पुरुत्तमे;

सुद्धोदनस्स पुत्तस्स, कण्डको सहजो अहं.

११८६. ‘‘यदा सो अड्ढरत्तायं, बोधाय मभिनिक्खमि;

सो मं मुदूहि पाणीहि, जालि [जाल (सी.)] तम्बनखेहि च.

११८७. ‘‘सत्थिं आकोटयित्वान, वह सम्माति चब्रवि;

अहं लोकं तारयिस्सं, पत्तो सम्बोधिमुत्तमं.

११८८. ‘‘तं मे गिरं सुणन्तस्स, हासो मे विपुलो अहु;

उदग्गचित्तो सुमनो, अभिसीसिं [अभिसिंसिं (सी.), अभिसीसि (पी.)] तदा अहं.

११८९. ‘‘अभिरूळ्हञ्च मं ञत्वा, सक्यपुत्तं महायसं;

उदग्गचित्तो मुदितो, वहिस्सं पुरिसुत्तमं.

११९०. ‘‘परेसं विजितं गन्त्वा, उग्गतस्मिं दिवाकरे [दिवङ्करे (स्या. क.)];

ममं छन्नञ्च ओहाय, अनपेक्खो सो अपक्कमि.

११९१. ‘‘तस्स तम्बनखे पादे, जिव्हाय परिलेहिसं;

गच्छन्तञ्च महावीरं, रुदमानो उदिक्खिसं.

११९२. ‘‘अदस्सनेनहं तस्स, सक्यपुत्तस्स सिरीमतो;

अलत्थं गरुकाबाधं, खिप्पं मे मरणं अहु.

११९३. ‘‘तस्सेव आनुभावेन, विमानं आवसामिदं;

सब्बकामगुणोपेतं, दिब्बं देवपुरम्हि च.

११९४. ‘‘यञ्च मे अहुवा हासो, सद्दं सुत्वान बोधिया;

तेनेव कुसलमूलेन, फुसिस्सं आसवक्खयं.

११९५. ‘‘सचे हि भन्ते गच्छेय्यासि, सत्थु बुद्धस्स सन्तिके;

ममापि नं वचनेन, सिरसा वज्जासि वन्दनं.

११९६. ‘‘अहम्पि दट्ठुं गच्छिस्सं, जिनं अप्पटिपुग्गलं;

दुल्लभं दस्सनं होति, लोकनाथान तादिन’’न्ति.

११९७. सो कतञ्ञू कतवेदी, सत्थारं उपसङ्कमि;

सुत्वा गिरं चक्खुमतो, धम्मचक्खुं विसोधयि.

११९८. विसोधेत्वा दिट्ठिगतं, विचिकिच्छं वतानि च;

वन्दित्वा सत्थुनो पादे, तत्थेवन्तरधायथाति [तत्थेवन्तरधायतीति (क.)].

कण्डकविमानं सत्तमं.