७. पेसवतीविमानवत्थु

६४६. ‘‘फलिकरजतहेमजालछन्नं, विविधचित्रतलमद्दसं सुरम्मं;

ब्यम्हं सुनिम्मितं तोरणूपपन्नं, रुचकुपकिण्णमिदं सुभं विमानं.

६४७. ‘‘भाति च दस दिसा नभेव सुरियो, सरदे तमोनुदो सहस्सरंसी;

तथा तपतिमिदं तव विमानं, जलमिव धूमसिखो निसे नभग्गे.

६४८. ‘‘मुसतीव नयनं सतेरताव [सतेरिताव (स्या. क.)], आकासे ठपितमिदं मनुञ्ञं;

वीणामुरजसम्मताळघुट्ठं, इद्धं इन्दपुरं यथा तवेदं.

६४९. ‘‘पदुमकुमुदुप्पलकुवलयं, योधिक [यूधिक (सी.)] बन्धुकनोजका [योथिका भण्डिका नोजका (स्या.)] च सन्ति;

सालकुसुमितपुप्फिता असोका, विविधदुमग्गसुगन्धसेवितमिदं.

६५०. ‘‘सळललबुजभुजक [सुजक (सी. स्या.)] संयुत्ता [सञ्ञता (सी.)], कुसकसुफुल्लितलतावलम्बिनीहि;

मणिजालसदिसा यसस्सिनी, रम्मा पोक्खरणी उपट्ठिता ते.

६५१. ‘‘उदकरुहा च येत्थि पुप्फजाता, थलजा ये च सन्ति रुक्खजाता;

मानुसकामानुस्सका च दिब्बा, सब्बे तुय्हं निवेसनम्हि जाता.

६५२. ‘‘किस्स संयमदमस्सयं विपाको, केनासि कम्मफलेनिधूपपन्ना;

यथा च ते अधिगतमिदं विमानं, तदनुपदं अवचासिळारपम्हे’’ति [पखुमेति (सी.)].

६५३. ‘‘यथा च मे अधिगतमिदं विमानं, कोञ्चमयूरचकोर [चङ्कोर (क.)] सङ्घचरितं;

दिब्य [दिब्ब (सी. पी.)] पिलवहंसराजचिण्णं, दिजकारण्डवकोकिलाभिनदितं.

६५४. ‘‘नानासन्तानकपुप्फरुक्खविविधा, पाटलिजम्बुअसोकरुक्खवन्तं;

यथा च मे अधिगतमिदं विमानं, तं ते पवेदयामि [पवदिस्सामि (सी.), पवेदिस्सामि (पी.)] सुणोहि भन्ते.

६५५. ‘‘मगधवरपुरत्थिमेन, नाळकगामो नाम अत्थि भन्ते;

तत्थ अहोसिं पुरे सुणिसा, पेसवतीति [सेसवतीति (सी. स्या.)] तत्थ जानिंसु ममं.

६५६. ‘‘साहमपचितत्थधम्मकुसलं, देवमनुस्सपूजितं महन्तं;

उपतिस्सं निब्बुतमप्पमेय्यं, मुदितमना कुसुमेहि अब्भुकिरिं [अब्भोकिरिं (सी. स्या. पी. क.)].

६५७. ‘‘परमगतिगतञ्च पूजयित्वा, अन्तिमदेहधरं इसिं उळारं;

पहाय मानुसकं समुस्सयं, तिदसगता इध मावसामि ठान’’न्ति.

पेसवतीविमानं सत्तमं.