१३. सिरिमण्डत्थेरगाथा

४४७. [उदा. ४५; चूळव. ३८५; परि. ३३९] ‘‘छन्नमतिवस्सति, विवटं नातिवस्सति;

तस्मा छन्नं विवरेथ, एवं तं नातिवस्सति.

४४८. [सं. नि. १.६६; नेत्ति. १८] ‘‘मच्चुनाब्भहतो लोको, जराय परिवारितो;

तण्हासल्लेन ओतिण्णो, इच्छाधूपायितो सदा.

४४९. ‘‘मच्चुनाब्भहतो लोको, परिक्खित्तो जराय च;

हञ्ञति निच्चमत्ताणो, पत्तदण्डोव तक्करो.

४५०. ‘‘आगच्छन्तग्गिखन्धाव, मच्चु ब्याधि जरा तयो;

पच्चुग्गन्तुं बलं नत्थि, जवो नत्थि पलायितुं.

४५१. ‘‘अमोघं दिवसं कयिरा, अप्पेन बहुकेन वा;

यं यं विजहते [विरहते (सी. पी.), विवहते (स्या.)] रत्तिं, तदूनं तस्स जीवितं.

४५२. ‘‘चरतो तिट्ठतो वापि, आसीनसयनस्स वा;

उपेति चरिमा रत्ति, न ते कालो पमज्जितु’’न्ति.

… सिरिमण्डो [सिरिमन्दो (सी.)] थेरो….