२. तिस्समेत्तेय्यमाणवपुच्छा

१०४६. ‘‘कोध सन्तुसितो लोके, (इच्चायस्मा तिस्समेत्तेय्यो)

कस्स नो सन्ति इञ्जिता;

को उभन्तमभिञ्ञाय, मज्झे मन्ता न लिप्पति [लिम्पति (क.)];

कं ब्रूसि महापुरिसोति, को इध सिब्बिनिमच्चगा’’.

१०४७. ‘‘कामेसु ब्रह्मचरियवा, (मेत्तेय्याति भगवा)

वीततण्हो सदा सतो;

सङ्खाय निब्बुतो भिक्खु, तस्स नो सन्ति इञ्जिता.

१०४८. ‘‘सो उभन्तमभिञ्ञाय, मज्झे मन्ता न लिप्पति;

तं ब्रूमि महापुरिसोति, सो इध सिब्बिनिमच्चगा’’ति.

तिस्समेत्तेय्यमाणवपुच्छा दुतिया निट्ठिता.