१. अजितमाणवपुच्छा

१०३८. ‘‘केनस्सु निवुतो लोको, (इच्चायस्मा अजितो)

केनस्सु नप्पकासति;

किस्साभिलेपनं ब्रूसि, किंसु तस्स महब्भयं’’.

१०३९. ‘‘अविज्जाय निवुतो लोको, (अजिताति भगवा)

वेविच्छा पमादा नप्पकासति;

जप्पाभिलेपनं ब्रूमि, दुक्खमस्स महब्भयं’’.

१०४०. ‘‘सवन्ति सब्बधि सोता, (इच्चायस्मा अजितो)

सोतानं किं निवारणं;

सोतानं संवरं ब्रूहि, केन सोता पिधिय्यरे’’ [पिथिय्यरे (सी. स्या. पी.), पिथीयरे (सी. अट्ठ.), पिधीयरे (?)].

१०४१. ‘‘यानि सोतानि लोकस्मिं, (अजिताति भगवा)

सति तेसं निवारणं;

सोतानं संवरं ब्रूमि, पञ्ञायेते पिधिय्यरे’’.

१०४२. ‘‘पञ्ञा चेव सति यञ्च [सती चेव (सी.), सती च (स्या.), सती चापि (पी. निद्देस), सति चापि (निद्देस)], (इच्चायस्मा अजितो)

नामरूपञ्च मारिस;

एतं मे पुट्ठो पब्रूहि, कत्थेतं उपरुज्झति’’.

१०४३. ‘‘यमेतं पञ्हं अपुच्छि, अजित तं वदामि ते;

यत्थ नामञ्च रूपञ्च, असेसं उपरुज्झति;

विञ्ञाणस्स निरोधेन, एत्थेतं उपरुज्झति’’.

१०४४. ‘‘ये च सङ्खातधम्मासे, ये च सेखा पुथू इध;

तेसं मे निपको इरियं, पुट्ठो पब्रूहि मारिस’’.

१०४५. ‘‘कामेसु नाभिगिज्झेय्य, मनसानाविलो सिया;

कुसलो सब्बधम्मानं, सतो भिक्खु परिब्बजे’’ति.

अजितमाणवपुच्छा पठमा निट्ठिता.