१. कामसुत्तं

७७२. कामं कामयमानस्स, तस्स चे तं समिज्झति;

अद्धा पीतिमनो होति, लद्धा मच्चो यदिच्छति.

७७३. तस्स चे कामयानस्स [कामयमानस्स (क.)], छन्दजातस्स जन्तुनो;

ते कामा परिहायन्ति, सल्लविद्धोव रुप्पति.

७७४. यो कामे परिवज्जेति, सप्पस्सेव पदा सिरो;

सोमं [सो इमं (सी. पी.)] विसत्तिकं लोके, सतो समतिवत्तति.

७७५. खेत्तं वत्थुं हिरञ्ञं वा, गवस्सं [गवास्सं (सी. स्या. पी.)] दासपोरिसं;

थियो बन्धू पुथु कामे, यो नरो अनुगिज्झति.

७७६. अबला नं बलीयन्ति, मद्दन्तेनं परिस्सया;

ततो नं दुक्खमन्वेति, नावं भिन्नमिवोदकं.

७७७. तस्मा जन्तु सदा सतो, कामानि परिवज्जये;

ते पहाय तरे ओघं, नावं सित्वाव [सिञ्चित्वा (सी.)] पारगूति.

कामसुत्तं पठमं निट्ठितं.