१०. उट्ठानसुत्तं

३३३. उट्ठहथ निसीदथ, को अत्थो सुपितेन वो;

आतुरानञ्हि का निद्दा, सल्लविद्धान रुप्पतं.

३३४. उट्ठहथ निसीदथ, दळ्हं सिक्खथ सन्तिया;

मा वो पमत्ते विञ्ञाय, मच्चुराजा अमोहयित्थ वसानुगे.

३३५. याय देवा मनुस्सा च, सिता तिट्ठन्ति अत्थिका;

तरथेतं विसत्तिकं, खणो वो [खणो वे (पी. क.)] मा उपच्चगा;

खणातीता हि सोचन्ति, निरयम्हि समप्पिता.

३३६. पमादो रजो पमादो, पमादानुपतितो रजो;

अप्पमादेन विज्जाय, अब्बहे [अब्बूळ्हे (स्या. पी.), अब्बुहे (क. अट्ठ.)] सल्लमत्तनोति.

उट्ठानसुत्तं दसमं निट्ठितं.