११. पञ्ञत्तिहारसम्पातो

७३. तत्थ कतमो पञ्ञत्तिहारसम्पातो?

‘‘तस्मा रक्खितचित्तस्स, सम्मासङ्कप्पगोचरो’’ति गाथा. ‘‘तस्मा रक्खितचित्तस्सा’’ति पदट्ठानपञ्ञत्ति सतिया. ‘‘सम्मासङ्कप्पगोचरो’’ति भावनापञ्ञत्ति समथस्स. ‘‘सम्मादिट्ठिपुरेक्खारो, ञत्वान उदयब्बय’’न्ति दस्सनभूमिया निक्खेपपञ्ञत्ति. ‘‘थिनमिद्धाभिभू भिक्खू’’ति समुदयस्स अनवसेसप्पहानपञ्ञत्ति, ‘‘सब्बा दुग्गतियो जहे’’ति भावनापञ्ञत्ति मग्गस्स.

नियुत्तो पञ्ञत्तिहारसम्पातो.