६. भोजनङ्गपञ्हो

६. ‘‘भन्ते नागसेन, ‘भोजनस्स तीणि अङ्गानि गहेतब्बानी’ति यं वदेसि, कतमानि तानि तीणि अङ्गानि गहेतब्बानी’’ति? ‘‘यथा, महाराज, भोजनं सब्बसत्तानं उपत्थम्भो, एवमेव खो, महाराज, योगिना योगावचरेन सब्बसत्तानं मग्गुपत्थम्भेन भवितब्बं. इदं, महाराज, भोजनस्स पठमं अङ्गं गहेतब्बं.

‘‘पुन चपरं, महाराज, भोजनं सब्बसत्तानं बलं वड्ढेति, एवमेव खो, महाराज, योगिना योगावचरेन पुञ्ञवड्ढिया वड्ढितब्बं. इदं, महाराज, भोजनस्स दुतियं अङ्गं गहेतब्बं.

‘‘पुन चपरं, महाराज, भोजनं सब्बसत्तानं अभिपत्थितं, एवमेव खो, महाराज, योगिना योगावचरेन सब्बलोकाभिपत्थितेन भवितब्बं. इदं, महाराज, भोजनस्स ततियं अङ्गं गहेतब्बं. भासितम्पेतं, महाराज, थेरेन महामोग्गल्लानेन –

‘‘‘संयमेन नियमेन, सीलेन पटिपत्तिया;

पत्थितेन भवितब्बं, सब्बलोकस्स योगिना’’’ति.

भोजनङ्गपञ्हो छट्ठो.