९. बाळिसिकङ्गपञ्हो

९. ‘‘भन्ते नागसेन, ‘बाळिसिकस्स द्वे अङ्गानि गहेतब्बानी’ति यं वदेसि, कतमानि तानि द्वे अङ्गानि गहेतब्बानी’’ति? ‘‘यथा, महाराज, बाळिसिको बळिसेन मच्छे उद्धरति, एवमेव खो, महाराज, योगिना योगावचरेन ञाणेन उत्तरिं सामञ्ञफलानि उद्धरितब्बानि. इदं, महाराज, बाळिसिकस्स पठमं अङ्गं गहेतब्बं.

‘‘पुन चपरं, महाराज, बाळिसिको परित्तकं वधित्वा विपुलं लाभमधिगच्छति, एवमेव खो, महाराज, योगिना योगावचरेन परित्तलोकामिसमत्तं परिच्चजितब्बं. लोकामिसमत्तं, महाराज, परिच्चजित्वा योगी योगावचरो विपुलं सामञ्ञफलं अधिगच्छति. इदं, महाराज, बाळिसिकस्स दुतियं अङ्गं गहेतब्बं. भासितम्पेतं, महाराज, थेरेन राहुलेन –

‘‘‘सुञ्ञतञ्चानिमित्तञ्च, विमोक्खञ्चाप्पणिहितं;

चतुरो फले छळभिञ्ञा, चजित्वा लोकामिसं लभे’’’ति.

बाळिसिकङ्गपञ्हो नवमो.