८. गोरूपङ्गपञ्हो

८. ‘‘भन्ते नागसेन, ‘गोरूपस्स चत्तारि अङ्गानि गहेतब्बानी’ति यं वदेसि, कतमानि तानि चत्तारि अङ्गानि गहेतब्बानी’’ति? ‘‘यथा, महाराज, गोरूपो सकं गेहं न विजहति, एवमेव खो, महाराज, योगिना योगावचरेन सको कायो न विजहितब्बो ‘अनिच्चुच्छादनपरिमद्दनभेदनविकिरणविद्धंसनधम्मो अयं कायो’ति. इदं, महाराज, गोरूपस्स पठमं अङ्गं गहेतब्बं.

‘‘पुन चपरं, महाराज, गोरूपो आदिन्नधुरो सुखदुक्खेन धुरं वहति, एवमेव खो, महाराज, योगिना योगावचरेन आदिन्नब्रह्मचरियेन सुखदुक्खेन याव जीवितपरियादाना आपाणकोटिकं ब्रह्मचरियं चरितब्बं. इदं, महाराज, गोरूपस्स दुतियं अङ्गं गहेतब्बं.

‘‘पुन चपरं, महाराज, गोरूपो छन्देन घायमानो पानीयं पिवति, एवमेव खो, महाराज, योगिना योगावचरेन आचरियुपज्झायानं अनुसिट्ठि छन्देन पेमेन पसादेन घायमानेन पटिग्गहेतब्बा. इदं, महाराज, गोरूपस्स ततियं अङ्गं गहेतब्बं.

‘‘पुन चपरं, महाराज, गोरूपो येन केनचि वाहियमानो वहति, एवमेव खो, महाराज, योगिना योगावचरेन थेरनवमज्झिमभिक्खूनम्पि गिहिउपासकस्सापि ओवादानुसासनी सिरसा सम्पटिच्छितब्बा. इदं, महाराज, गोरूपस्स चतुत्थं अङ्गं गहेतब्बं. भासितम्पेतं, महाराज, थेरेन सारिपुत्तेन धम्मसेनापतिना –

‘‘‘तदहु पब्बजितो सन्तो, जातिया सत्तवस्सिको;

सोपि मं अनुसासेय्य, सम्पटिच्छामि मत्थके [मुद्धना (सी.)].

‘‘‘तिब्बं छन्दञ्च पेमञ्च, तस्मिं दिस्वा उपट्ठपे;

ठपेय्याचरियट्ठाने, सक्कच्च नं पुनप्पुन’’’न्ति.

गोरूपङ्गपञ्हो अट्ठमो.