७. मिगङ्गपञ्हो

७. ‘‘भन्ते नागसेन, ‘मिगस्स तीणि अङ्गानि गहेतब्बानी’ति यं वदेसि, कतमानि तानि तीणि अङ्गानि गहेतब्बानी’’ति? ‘‘यथा, महाराज, मिगो दिवा अरञ्ञे चरति, रत्तिं अब्भोकासे, एवमेव खो, महाराज, योगिना योगावचरेन दिवा अरञ्ञे विहरितब्बं, रत्तिं अब्भोकासे. इदं, महाराज, मिगस्स पठमं अङ्गं गहेतब्बं.

‘‘भासितम्पेतं, महाराज, भगवता देवातिदेवेन लोमहंसनपरियाये –

‘सो खो अहं, सारिपुत्त, या ता रत्तियो सीता हेमन्तिका अन्तरट्ठका हिमपातसमया [अन्तरट्ठके हिमपातसमये (सी. पी. क.)], तथारूपासु रत्तीसु रत्तिं अब्भोकासे विहरामि, दिवा वनसण्डे. गिम्हानं पच्छिमे मासे दिवा अब्भोकासे विहरामि, रत्तिं वनसण्डे’ति.

‘‘पुन चपरं, महाराज, मिगो सत्तिम्हि वा सरे वा ओपतन्ते वञ्चेति [वज्जेति (क.)] पलायति, न कायमुपनेति, एवमेव खो, महाराज, योगिना योगावचरेन किलेसेसु ओपतन्तेसु वञ्चयितब्बं [वज्जयितब्बं (क.)] पलायितब्बं, न चित्तमुपनेतब्बं. इदं, महाराज, मिगस्स दुतियं अङ्गं गहेतब्बं.

‘‘पुन चपरं, महाराज, मिगो मनुस्से दिस्वा येन वा तेन वा पलायति ‘मा मं ते अद्दसंसू’ति, एवमेव खो, महाराज, योगिना योगावचरेन भण्डनकलहविग्गहविवादसीले दुस्सीले कुसीते सङ्गणिकारामे दिस्वा येन वा तेन वा पलायितब्बं ‘मा मं ते अद्दसंसु, अहञ्च ते मा अद्दस’न्ति. इदं, महाराज, मिगस्स ततियं अङ्गं गहेतब्बं. भासितम्पेतं, महाराज, थेरेन सारिपुत्तेन धम्मसेनापतिना –

‘‘‘मा मे कदाचि पापिच्छो, कुसीतो हीनवीरियो;

अप्पस्सुतो अनाचारो, सम्मतो [समेतो (सी. पी.)] अहु कत्थची’’’ति.

मिगङ्गपञ्हो सत्तमो.