८. चापङ्गपञ्हो

८. ‘‘भन्ते नागसेन, ‘चापस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, चापो सुतच्छितो नमितो [मितो (सी. पी. क.)] यावग्गमूलं समकमेव अनुनमति नप्पटित्थम्भति, एवमेव खो, महाराज, योगिना योगावचरेन थेरनवमज्झिमसमकेसु अनुनमितब्बं नप्पटिफरितब्बं. इदं, महाराज, चापस्स एकं अङ्गं गहेतब्बं. भासितम्पेतं, महाराज, भगवता देवातिदेवेन विधुर [पुण्णक] जातके –

‘‘‘चापोवूनुदरो धीरो, वंसो वापि पकम्पये [चापो वा नुन मे धीरो, वंसोव अनुलोमयं (सी. पी. क.)];

पटिलोमं न वत्तेय्य, स राजवसतिं वसे’’’ति.

चापङ्गपञ्हो अट्ठमो.