४३२. पदकुसलमाणवजातकं (६)

४९. बहुस्सुतं चित्तकथिं [चित्तकथं (स्या. क.)], गङ्गा वहति पाटलिं [पाटलं (सी. पी.)];

वुय्हमानक भद्दन्ते, एकं मे देहि गाथकं [गीतकं (क. अट्ठ.)].

५०. येन सिञ्चन्ति दुक्खितं, येन सिञ्चन्ति आतुरं;

तस्स मज्झे मरिस्सामि, जातं सरणतो भयं.

५१. यत्थ बीजानि रूहन्ति, सत्ता यत्थ पतिट्ठिता;

सा मे सीसं निपीळेति, जातं सरणतो भयं.

५२. येन भत्तानि पच्चन्ति, सीतं येन विहञ्ञति;

सो मं डहति [दय्हति (क.)] गत्तानि, जातं सरणतो भयं.

५३. येन भुत्तेन [भत्तेन (स्या. क.)] यापेन्ति, पुथू ब्राह्मणखत्तिया;

सो मं भुत्तो ब्यापादेति, जातं सरणतो भयं.

५४. गिम्हानं पच्छिमे मासे, वातमिच्छन्ति पण्डिता;

सो मं [सो मे (सी. पी.)] भञ्जति गत्तानि, जातं सरणतो भयं.

५५. यं निस्सिता जगतिरुहं, स्वायं अग्गिं पमुञ्चति;

दिसा भजथ वक्कङ्गा, जातं सरणतो भयं.

५६. यमानयिं सोमनस्सं, मालिनिं चन्दनुस्सदं;

सा मं घरा निच्छुभति [नीहरति (सी. स्या.)], जातं सरणतो भयं.

५७. येन जातेन नन्दिस्सं, यस्स च भवमिच्छिसं;

सो मं घरा निच्छुभति [नीहरति (सी. स्या.)], जातं सरणतो भयं.

५८. सुणन्तु मे जानपदा, नेगमा च समागता;

यतोदकं तदादित्तं, यतो खेमं ततो भयं.

५९. राजा विलुम्पते रट्ठं, ब्राह्मणो च पुरोहितो;

अत्तगुत्ता विहरथ, जातं सरणतो भयन्ति.

पदकुसलमाणवजातकं छट्ठं.