३९४. वट्टकजातकं (६-२-९)

१२८. पणीतं भुञ्जसे भत्तं, सप्पितेलञ्च मातुल;

अथ केन नु वण्णेन, किसो त्वमसि वायस.

१२९. अमित्तमज्झे वसतो, तेसु आमिसमेसतो;

निच्चं उब्बिग्गहदयस्स, कुतो काकस्स दळ्हियं.

१३०. निच्चं उब्बेगिनो [उब्बिग्गिनो (स्या. क.), उब्बेधिनो (सी.)] काका, धङ्का पापेन कम्मुना;

लद्धो पिण्डो न पीणेति, किसो तेनस्मि वट्टक.

१३१. लूखानि तिणबीजानि, अप्पस्नेहानि भुञ्जसि;

अथ केन नु वण्णेन, थूलो त्वमसि वट्टक.

१३२. अप्पिच्छा अप्पचिन्ताय, अदूरगमनेन च;

लद्धालद्धेन यापेन्तो, थूलो तेनस्मि वायस.

१३३. अप्पिच्छस्स हि पोसस्स, अप्पचिन्तसुखस्स [अप्पचिन्तिसुखस्स (सी. स्या. पी.)] च;

सुसङ्गहितमानस्स [सुसङ्गहितपमाणस्स (सी. स्या. पी.)], वुत्ती सुसमुदानयाति.

वट्टकजातकं नवमं.