३८५. नन्दियमिगराजजातकं (६-१-१०)

७०. सचे ब्राह्मण गच्छेसि, साकेते [साकेतं (सी. स्या.)] अज्जुनं [अञ्झनं (सी. स्या. पी.)] वनं;

वज्जासि नन्दियं नाम, पुत्तं अस्माकमोरसं;

माता पिता च ते वुद्धा, ते तं इच्छन्ति पस्सितुं.

७१. भुत्ता मया निवापानि, राजिनो पानभोजनं;

तं राजपिण्डं अवभोत्तुं [अवभोत्तं (क.)], नाहं ब्राह्मण मुस्सहे.

७२. ओदहिस्सामहं पस्सं, खुरप्पानिस्स [खुरप्पाणिस्स (सी.), खुरपाणिस्स (पी.), खुरप्पपाणिस्स (?)] राजिनो;

तदाहं सुखितो मुत्तो, अपि पस्सेय्य मातरं.

७३. मिगराजा पुरे आसिं, कोसलस्स निकेतने [निकेतवे (सी. स्या. पी.)];

नन्दियो नाम नामेन, अभिरूपो चतुप्पदो.

७४. तं मं वधितुमागच्छि, दायस्मिं अज्जुने वने;

धनुं आरज्जं [आरज्जुं (निय्य), अदेज्झं (सी. पी.) अद्वेधाभावं एकीभावन्ति अत्थो] कत्वान, उसुं सन्नय्ह [सन्धाय (सी. पी.)] कोसलो.

७५. तस्साहं ओदहिं पस्सं, खुरप्पानिस्स राजिनो;

तदाहं सुखितो मुत्तो, मातरं दट्ठुमागतोति.

नन्दियमिगराजजातकं दसमं.

अवारियवग्गो पठमो.

तस्सुद्दानं –

अथ कुज्झरथेसभ केतुवरो, सदरीमुख नेरु लता च पुन;

अपनन्द सिरी च सुचित्तवरो, अथ धम्मिक नन्दिमिगेन दसाति.