३८१. मिगालोपजातकं (६-१-६)

३४. न मे रुच्चि मिगालोप, यस्स ते तादिसी गती;

अतुच्चं तात पतसि, अभूमिं तात सेवसि.

३५. चतुक्कण्णंव केदारं, यदा ते पथवी सिया;

ततो तात निवत्तस्सु, मास्सु एत्तो परं गमि.

३६. सन्ति अञ्ञेपि सकुणा, पत्तयाना विहङ्गमा;

अक्खित्ता वातवेगेन, नट्ठा ते सस्सतीसमा.

३७. अकत्वा अपनन्दस्स [अपरण्णस्स (सी. स्या. पी.)], पितु वुद्धस्स सासनं;

कालवाते अतिक्कम्म, वेरम्भानं वसं अगा [गतो (सी.)].

३८. तस्स पुत्ता च दारा च, ये चञ्ञे अनुजीविनो;

सब्बे ब्यसनमापादुं, अनोवादकरे दिजे.

३९. एवम्पि इध वुद्धानं, यो वाक्यं नावबुज्झति;

अतिसीमचरो [अतिसीमं चरो (सी. स्या. क.)] दित्तो, गिज्झोवातीतसासनो;

सब्बे ब्यसनं पप्पोन्ति, अकत्वा बुद्धसासनन्ति.

मिगालोपजातकं छट्ठं.