३८०. आसङ्कजातकं (६-१-५)

२६. आसावती नाम लता, जाता चित्तलतावने;

तस्सा वस्ससहस्सेन, एकं निब्बत्तते फलं.

२७. तं देवा पयिरुपासन्ति, ताव दूरफलं सतिं;

आसीसेव [आसिंसेव (सी. स्या. पी.)] तुवं राज, आसा फलवती सुखा.

२८. आसीसतेव [आसिंसेथेव (सी. स्या. पी.)] सो पक्खी, आसीसतेव [आसिंसेथेव (सी. स्या. पी.)] सो दिजो;

तस्स चासा [तस्सेवासा (स्या.)] समिज्झति, ताव दूरगता सती;

आसीसेव तुवं राज, आसा फलवती सुखा.

२९. सम्पेसि खो मं वाचाय, न च सम्पेसि [संसेसि (क.)] कम्मुना;

माला सेरेय्यकस्सेव, वण्णवन्ता अगन्धिका.

३०. अफलं मधुरं वाचं, यो मित्तेसु पकुब्बति;

अददं अविस्सजं भोगं, सन्धि तेनस्स जीरति.

३१. यञ्हि कयिरा तञ्हि वदे, यं न कयिरा न तं वदे;

अकरोन्तं भासमानं, परिजानन्ति पण्डिता.

३२. बलञ्च वत मे खीणं, पाथेय्यञ्च न विज्जति;

सङ्के पाणूपरोधाय, हन्द दानि वजामहं.

३३. एतदेव हि मे नामं, यं नामस्मि रथेसभ;

आगमेहि महाराज, पितरं आमन्तयामहन्ति.

आसङ्कजातकं पञ्चमं.