३६२. सीलवीमंसजातकं (५-२-२)

६५. सीलं सेय्यो सुतं सेय्यो, इति मे संसयो अहु;

सीलमेव सुता सेय्यो, इति मे नत्थि संसयो.

६६. मोघा जाति च वण्णो च, सीलमेव किरुत्तमं;

सीलेन अनुपेतस्स, सुतेनत्थो न विज्जति.

६७. खत्तियो च अधम्मट्ठो, वेस्सो चाधम्मनिस्सितो;

ते परिच्चज्जुभो लोके, उपपज्जन्ति दुग्गतिं.

६८. खत्तिया ब्राह्मणा वेस्सा, सुद्दा चण्डालपुक्कुसा;

इध धम्मं चरित्वान, भवन्ति तिदिवे समा.

६९. न वेदा सम्परायाय, न जाति नापि [नोपि (पी.)] बन्धवा;

सकञ्च सीलं संसुद्धं, सम्परायाय सुखाय चाति [सुखावहन्ति (सी. स्या.)].

सीलवीमंसजातकं दुतियं.