३५९. सुवण्णमिगजातकं (५-१-९)

५०. विक्कम रे हरिपाद [महामिग (सी. स्या. पी.)], विक्कम रे महामिग [हरीपद (सी. स्या. पी.)];

छिन्द वारत्तिकं पासं, नाहं एका वने रमे.

५१. विक्कमामि न पारेमि, भूमिं सुम्भामि वेगसा;

दळ्हो वारत्तिको पासो, पादं मे परिकन्तति.

५२. अत्थरस्सु पलासानि, असिं निब्बाह लुद्दक;

पठमं मं वधित्वान, हन पच्छा महामिगं.

५३. न मे सुतं वा दिट्ठं वा, भासन्तिं मानुसिं मिगिं [न मे सुता वा दिट्ठा वा, भासन्ती मानुसिं मिगी (टीका)];

त्वञ्च भद्दे सुखी होहि, एसो चापि महामिगो.

५४. एवं लुद्दक नन्दस्सु, सह सब्बेहि ञातिभि;

यथाहमज्ज नन्दामि, मुत्तं दिस्वा महामिगन्ति.

सुवण्णमिगजातकं नवमं.