३४४. अम्बजातकं (४-५-४)

१७३. यो नीलियं मण्डयति, सण्डासेन विहञ्ञति;

तस्स सा वसमन्वेतु, या ते अम्बे अवाहरि.

१७४. वीसं वा पञ्चवीसं [पण्णुवीसं (क. सी. पी.)] वा, ऊनतिंसं व जातिया;

तादिसा पति मा लद्धा [पतिं मा लद्धा (पी.), पति मा’लत्थ (?)], या ते अम्बे अवाहरि.

१७५. दीघं गच्छतु अद्धानं, एकिका अभिसारिका;

सङ्केते पति मा अद्द [मा अद्दस (सी. पी.)], या ते अम्बे अवाहरि.

१७६. अलङ्कता सुवसना, मालिनी चन्दनुस्सदा;

एकिका सयने सेतु, या ते अम्बे अवाहरीति.

अम्बजातकं [अम्बचोरजातकं (क. सी. पी.)] चतुत्थं.