३३८. थुसजातकं (४-४-८)

१४९. विदितं थुसं उन्दुरानं [उन्दूरानं (क.)], विदितं पन तण्डुलं;

थुसं थुसं [थुसं थूलं (सी.)] विवज्जेत्वा, तण्डुलं पन खादरे.

१५०. या मन्तना अरञ्ञस्मिं, या च गामे निकण्णिका;

यञ्चेतं इति चीति च, एतम्पि विदितं मया.

१५१. धम्मेन किर जातस्स, पिता पुत्तस्स मक्कटो;

दहरस्सेव सन्तस्स, दन्तेहि फलमच्छिदा.

१५२. यमेतं परिसप्पसि [परिसब्बेसि (क.)], अजकाणोव सासपे;

योपायं हेट्ठतो सेति [सेसि (सी.)], एतम्पि विदितं मयाति.

थुसजातकं अट्ठमं.