२९९. कोमारपुत्तजातकं (३-५-९)

१४५. पुरे तुवं सीलवतं सकासे, ओक्कन्तिकं [ओक्कन्दिकं (सी. स्या. पी.)] कीळसि अस्समम्हि;

करोहरे [करोहि रे (क.)] मक्कटियानि मक्कट, न तं मयं सीलवतं रमाम.

१४६. सुता हि मय्हं परमा विसुद्धि, कोमारपुत्तस्स बहुस्सुतस्स;

मा दानि मं मञ्ञि तुवं यथा पुरे, झानानुयुत्तो विहरामि [झानानुयुत्ता विहराम (सी. पी.)] आवुसो.

१४७. सचेपि सेलस्मि वपेय्य बीजं, देवो च वस्से न हि तं विरूळ्हे [नेव हि तं रुहेय्य (सी. पी.), न हि तं विरूहे (?)];

सुता हि ते सा परमा विसुद्धि, आरा तुवं मक्कट झानभूमियाति.

कोमारपुत्तजातकं नवमं.