५. कुम्भवग्गो

२९१. सुराघटजातकं (२-५-१)

१२१. सब्बकामददं कुम्भं, कुटं लद्धान धुत्तको;

याव नं अनुपालेति, ताव सो सुखमेधति.

१२२. यदा मत्तो च दित्तो च, पमादा कुम्भमब्भिदा;

तदा नग्गो च पोत्थो च, पच्छा बालो विहञ्ञति.

१२३. एवमेव यो धनं लद्धा, पमत्तो [अमत्ता (सी.), अमत्तो (पी.)] परिभुञ्जति;

पच्छा तप्पति दुम्मेधो, कुटं भित्वाव [कुटं भिन्नोव (सी. पी.), कुटभिन्नोव (?)] धुत्तकोति.

सुराघट [भद्रघट (सी. पी.), भद्रघटभेदक (स्या.)] जातकं पठमं.

२९२. सुपत्तजातकं (३-५-२)

१२४. बाराणस्यं [बाराणस्सं (सी. पी.)] महाराज, काकराजा निवासको [निवासिको (सी. पी.)];

असीतिया सहस्सेहि, सुपत्तो परिवारितो.

१२५. तस्स दोहळिनी भरिया, सुफस्सा भक्खितुमिच्छति [मच्छमिच्छति (सी. पी.)];

रञ्ञो महानसे पक्कं, पच्चग्घं राजभोजनं.

१२६. तेसाहं पहितो दूतो, रञ्ञो चम्हि इधागतो;

भत्तु अपचितिं कुम्मि, नासायमकरं [मकरिं (सी. निस्सय)] वणन्ति.

सुपत्तजातकं दुतियं.

२९३. कायनिब्बिन्दजातकं (३-५-३)

१२७. फुट्ठस्स मे अञ्ञतरेन ब्याधिना, रोगेन बाळ्हं दुखितस्स रुप्पतो;

परिसुस्सति खिप्पमिदं कळेवरं, पुप्फं यथा पंसुनि आतपे कतं.

१२८. अजञ्ञं जञ्ञसङ्खातं, असुचिं सुचिसम्मतं;

नानाकुणपपरिपूरं, जञ्ञरूपं अपस्सतो.

१२९. धिरत्थुमं आतुरं पूतिकायं, जेगुच्छियं अस्सुचिं ब्याधिधम्मं;

यत्थप्पमत्ता अधिमुच्छिता पजा, हापेन्ति मग्गं सुगतूपपत्तियाति.

कायनिब्बिन्द [कायविच्छन्द (सी.), कायविच्छिन्द (पी.)] जातकं ततियं.

२९४. जम्बुखादकजातकं (३-५-४)

१३०. कोयं बिन्दुस्सरो वग्गु, सरवन्तान [पवदन्तान (सी. पी.)] मुत्तमो;

अच्चुतो जम्बुसाखाय, मोरच्छापोव कूजति.

१३१. कुलपुत्तोव जानाति [कुलपुत्तो पजानाति (स्या. क.)], कुलपुत्तं [कुलपुत्ते (सी. पी.)] पसंसितुं;

ब्यग्घच्छापसरीवण्ण, भुञ्ज सम्म ददामि ते.

१३२. चिरस्सं वत पस्सामि, मुसावादी समागते;

वन्तादं कुणपादञ्च, अञ्ञमञ्ञं पसंसकेति.

जम्बुखादकजातकं चतुत्थं.

२९५. अन्तजातकं (३-५-५)

१३३. उसभस्सेव ते खन्धो, सीहस्सेव विजम्भितं;

मिगराज नमो त्यत्थु, अपि किञ्चि लभामसे.

१३४. कुलपुत्तोव जानाति, कुलपुत्तं पसंसितुं;

मयूरगीवसङ्कास, इतो परियाहि वायस.

१३५. मिगानं सिङ्गालो [कोत्थुको (सी. पी.), कोट्ठुको (स्या.)] अन्तो, पक्खीनं पन वायसो;

एरण्डो अन्तो रुक्खानं, तयो अन्ता समागताति.

अन्तजातकं पञ्चमं.

२९६. समुद्दजातकं (३-५-६)

१३६. को नायं [को न्वायं (स्या.)] लोणतोयस्मिं, समन्ता परिधावति;

मच्छे मकरे च वारेति, ऊमीसु च विहञ्ञति.

१३७. अनन्तपायी सकुणो, अतित्तोति दिसासुतो;

समुद्दं पातुमिच्छामि, सागरं सरितं पतिं.

१३८. सो अयं हायति चेव, पूरते च महोदधि;

नास्स नायति पीतन्तो, अपेय्यो किर सागरोति.

समुद्दजातकं छट्ठं.

२९७. कामविलापजातकं (३-५-७)

१३९. उच्चे सकुण डेमान, पत्तयान विहङ्गम;

वज्जासि खो त्वं वामूरुं, चिरं खो सा करिस्सति [सरिस्सति (क.)].

१४०. इदं खो सा न जानाति, असिं सत्तिञ्च ओड्डितं;

सा चण्डी काहति कोधं, तं मे तपति नो इदं [नो इध (सी. स्या. पी.)].

१४१. एस उप्पलसन्नाहो, निक्खञ्चुस्सीसकोहितं [निक्खमुस्सीसके कतं (सी. पी.), निक्खञ्चुस्सीसके कतं (स्या.)];

कासिकञ्च मुदुं वत्थं, तप्पेतु धनिका पियाति [धनकामियाति (स्या. पी.), धनकामिकाति (सी.)].

कामविलापजातकं सत्तमं.

२९८. उदुम्बरजातकं (३-५-८)

१४२. उदुम्बरा चिमे पक्का, निग्रोधा च कपित्थना;

एहि निक्खम भुञ्जस्सु, किं जिघच्छाय मिय्यसि.

१४३. एवं सो सुहितो होति, यो वुड्ढमपचायति;

यथाहमज्ज सुहितो, दुमपक्कानि मासितो.

१४४. यं वनेजो वनेजस्स, वञ्चेय्य कपिनो कपि;

दहरो कपि [दहरोपि तं न (सी. पी.), दहरोपि न (स्या.)] सद्धेय्य, न हि जिण्णो जराकपीति.

उदुम्बरजातकं अट्ठमं.

२९९. कोमारपुत्तजातकं (३-५-९)

१४५. पुरे तुवं सीलवतं सकासे, ओक्कन्तिकं [ओक्कन्दिकं (सी. स्या. पी.)] कीळसि अस्समम्हि;

करोहरे [करोहि रे (क.)] मक्कटियानि मक्कट, न तं मयं सीलवतं रमाम.

१४६. सुता हि मय्हं परमा विसुद्धि, कोमारपुत्तस्स बहुस्सुतस्स;

मा दानि मं मञ्ञि तुवं यथा पुरे, झानानुयुत्तो विहरामि [झानानुयुत्ता विहराम (सी. पी.)] आवुसो.

१४७. सचेपि सेलस्मि वपेय्य बीजं, देवो च वस्से न हि तं विरूळ्हे [नेव हि तं रुहेय्य (सी. पी.), न हि तं विरूहे (?)];

सुता हि ते सा परमा विसुद्धि, आरा तुवं मक्कट झानभूमियाति.

कोमारपुत्तजातकं नवमं.

३००. वकजातकं (३-५-१०)

१४८. परपाणरोधा [परपाणघाते (स्या.), परपाणरोचं (क.)] जीवन्तो, मंसलोहितभोजनो;

वको वतं समादाय, उपपज्जि उपोसथं.

१४९. तस्स सक्को वतञ्ञाय, अजरूपेनुपागमि;

वीततपो अज्झप्पत्तो, भञ्जि लोहितपो तपं.

१५०. एवमेव इधेकच्चे, समादानम्हि दुब्बला;

लहुं करोन्ति अत्तानं, वकोव अजकारणाति.

वकजातकं दसमं.

कुम्भवग्गो पञ्चमो.

तस्सुद्दानं –

वरकुम्भ सुपत्तसिरिव्हयनो, सुचिसम्मत बिन्दुसरो चुसभो;

सरितंपति चण्डि जराकपिना, अथ मक्कटिया वककेन दसाति.

अथ वग्गुद्दानं –

सङ्कप्पो पदुमो चेव, उदपानेन ततियं;

अब्भन्तरं घटभेदं, तिकनिपातम्हिलङ्कतन्ति.

तिकनिपातं निट्ठितं.