२६०. दूतजातकं (३-१-१०)

२८. यस्सत्था दूरमायन्ति, अमित्तमपि याचितुं;

तस्सूदरस्सहं दूतो, मा मे कुज्झ [कुज्झि (सी. पी.)] रथेसभ.

२९. यस्स दिवा च रत्तो च, वसमायन्ति माणवा;

तस्सूदरस्सहं दूतो, मा मे कुज्झ [कुज्झि (सी. पी.)] रथेसभ.

३०. ददामि ते ब्राह्मण रोहिणीनं, गवं सहस्सं सह पुङ्गवेन;

दूतो हि दूतस्स कथं न दज्जं, मयम्पि तस्सेव भवाम दूताति.

दूतजातकं दसमं.

सङ्कप्पवग्गो पठमो.

तस्सुद्दानं –

उसुकारवरो तिलमुट्ठि मणि, हयराज विहङ्गम आसिविसो;

जनसन्ध कहापणवस्स पुन, तिरिटं पुन दूतवरेन दसाति.